" ရွက်ကြွေတောက နွေခေါ်သံ " အပိုင်း - ( ၃ )
"မြင်ခဲ့တယ်၊အတွေးထဲကနေ ဖျောက်ပစ်မရဘူး၊
စကားနည်းပြီး ချစ်စရာကောင်းတဲ့အမူအရာလေးနဲ့
သိပ်လှတဲ့မိန်းကလေးတစ်ယောက်၊
အကြည့်ချင်းဆုံမိတဲ့အခိုက်အတန့်လေး
သူရှက်သွားလိုက်တာများ၊ အို - သူ့အကြောင်းတွေးမိတာ
ငါ့ရင်ခုန်သံတွေ ဘာလို့မြန်လာပါလိမ့်၊
ငါ သူ့ကိုချစ်မိနေပြီလား၊ ဒါအချစ်လား ? "
အတွေးစတွေ နယ်ချဲ့ကာ
တစ်ယောက်တည်းအိပ်မပျော်တဲ့ညတွေ စိပ်လာခဲ့တယ်လေ။
ပိုက်ကွန်ထဲငြိနေတဲ့ငါးတစ်ကောင်လို
ရုန်းထွက်ဖို့ ကျိုးစားလေ ရစ်ပတ်လေပါပဲ။
အရွယ်ရောက်လာတဲ့ ကောင်လေးတစ်ယောက်အတွက်
အချစ်ဆိုတာကို ခံစားသိရှိနိုင်ပေမယ့် ---
မောင်ခိုင်ထူး အတွက်တော့ အချစ်ဆိုတာကို
အခုမှနဖူးတွေ့ဒူးတွေ့ တွေ့ရသူတစ်ယောက်၊
မောင်ခိုင်ထူးဆိုတာ သာမန်တောသားလေးပါ၊
ပန်းလောင်မြစ်တစ်လျှောက်မှာ ဝါးတွေကို
အရောင်းအဝယ်လုပ်ခြင်းဟာ
လွန်ခဲ့တဲ့ နှစ်ပေါင်းများစွာကတည်းက
ဒေသခံတွေကို လုပ်ကိုင်ခွင့်ပေးခဲ့တာမို့
မောင်ခိုင်ထူးတို့လည်း ဝါးတွေခုတ်ပြီး
ဝါးဖောင်တွေပြုလုပ်ကာ ရောင်းချဖို့အတွက်
ပန်းလောင်မြစ်ကို စုန်ဆင်းကြရတယ်၊
မောင်ခိုင်ထူးတို့လို လုပ်ကိုင်နေကြတဲ့လူတွေလည်း
မနည်းလှပါဘူး၊
အဲလိုလုပ်ကိုင်နေကြတဲ့ လူတွေထဲမှာ
မိခွေးမတို့မိသားစုလည်း အပါအဝင်ပေါ့၊
တစ်နေ့မှာ ----
မောင်ခိုင်ထူးတို့သားအဖနှစ်ယောက်က
ဝါးဖောင်နဲ့စုန်ဆင်းလာချိန် မိခွေးမတို့နဲ့
တိုက်တိုက်ဆိုင်ဆိုင် ဆုံတွေ့ကြလေရဲ့၊
မိခွေးမလေးက မောင်ခိုင်ထူးရဲ့အဖေဖြစ်သူ
ဦးဖေတင့်နဲ့သိနေလေတော့ ဧည့်ဝတ်ပျူငှါစွာ
ဖိတ်ခေါ်ပါတယ်။
"ဦးလေးဖေ သမီးတို့တဲမှာ လာနားပါဦး၊ရေနွေးကြမ်းလေး
လာသောက်ပါဦး၊ဖြေးဖြေးပေါ့ ဦးလေးဖေရယ်"
"အင်း သမီး၊ဦးလေးတို့လည်း အတော် ပင်ပမ်းလာပြီ၊
ဦးလေး ဝါးဖောင်ချည်ပြီးရင် လာခဲ့မယ်လေ"
"ဟုတ်ကဲ့ပါ ဦးလေးဖေ"
မိခွေးမလေးတို့ တဲစုဟာ ရေစပ်နဲ့ နည်းနည်း
ဝေးနေပါတယ်။
မိခွေးမလေးလည်း ရေခပ်ပြီးတက်သွားလေရဲ့၊
ဦးဖေတင့်တို့သားအဖနှစ်ယောက်လည်း
ဝါးဖောင်ချည်ပြီး နောက်ကလိုက်တက်ကြပါတယ်။
ဒီလိုနဲ့ မောင်ခိုင်ထူးနဲ့မိခွေးမလေးတို့နှစ်ယောက်
မထင်မှတ်ဘဲ ဆုံတွေ့ခဲ့ကြတယ်။
နှစ်ယောက်စလုံး မဆုံဖူးကြပေမယ့် ---
ရှေးဘဝကရေစက်တွေရှိခဲ့ဖူးတယ်လားမသိ
တစ်ယောက်ကိုတစ်ယောက် တိတ်တခိုးခင်တွယ်နေကြတယ်။
ဒါပေမယ့် ---
နှစ်ယောက်စလုံးဟာ တွေ့ဆုံကြတဲ့အချိန်တိုင်းမှာ
ကြည့်ရုံကလွဲပြီး စကားသံတွေ တိတ်ဆိတ်နေခဲ့ကြတယ်။
တစ်ဖြည်းဖြည်းနဲ့ မောင်ခိုင်ထူးနဲ့မိခွေးမလေးတို့ရဲ့
အကြည့်တွေမှာ အဓိပ္ပါယ်တွေပါဝင်လာတယ်၊
ချစ်ခြင်းမေတ္တာအတွက် အစပျိုးလာကြတယ်၊
တွေ့ရဖန်များလာတော့ မိခွေးမလေးလည်း
မောင်ခိုင်ထူးအပေါ် သံယောဉ်ဇဉ်ဖြစ်နေတယ်ဆိုတာ
ဝါးဖောင်မျောပြီးရောက်လာမယ့် မောင်ခိုင်ထူးကို
မျှော်နေတတ်လာတာလေးက သက်သေပြနေပါတယ်။