【宅人儲錢攻略】(四) 點樣邊睇戲邊慳錢？

之前寫咗三篇文章教儲錢妙法，唔知大家覺得有無用呢？如果未睇過，可以去呢度重溫，呢幾招任何時候都啱用架。

(一) 1毫子都唔好蝕畀港鐵
https://medium.com/@veryotaku/otakusavemoney01-1ce8b3ce3e3
(二) 點樣拎「交通補貼」最著數
https://medium.com/@veryotaku/otakusavemoney02-865501b4d6c1
(三) 無信用卡都可網購
https://medium.com/@veryotaku/otakusavemoney03-b165097473b2

以上幾篇，都係教大家搭車同網購慳錢，可能有人會覺得呢啲招數，同題目裡面嘅「宅人」無乜關係喎，係咪搵笨？OK，嚟緊我會盡量從宅人角度出發，今次就先嚟研究吓，點樣買戲飛先最抵。

而家啲日本劇場版動畫，周不時會喺香港上映，前賣券又多嘢送，身為宅人實在好難忍手。就算唔鍾意睇戲，戲院而家仲多咗唔少Live Viewing場，宅人可以留喺香港睇，就睇到日本聲優/偶像concert，或者舞台劇直播，唔駛再咁辛苦走去買黃牛飛、撲1蚊機票，同埋搭凌晨機趕餐矇，畀二三百蚊簡直抵到爛。

但大家買飛時，有無諗過點先可以慳到錢？方法其實好簡單，就係入會做會員喇！不過據我所知，身邊好多宅都會嫌麻煩無入會，加上做會員要畀年費，啲人怕睇得唔夠多，分分鐘倒蝕。我自己就做咗某啲院線嘅會員好多年，都叫有啲心得，而家就同大家分享吓。

一. 做戲院會員有乜好處？
通常有兩大著數。

第一︰買飛可以儲積分，之後可以用積分嚟換返飛；
第二︰買正價飛有折扣。

以我最常用嘅百老匯bc VIP (bcinephile) 會員為例，入會後消費可儲5%積分，即係$100戲飛就儲5分，之後可以用30/60/70分(視戲院而定)來換正價戲票買一送一優惠。

而買正價戲票，就可以有8折/85折優惠(視影院而定)，注意買一送一同正價折扣兩個優惠，買飛時只可揀其中一個。

二. 睇戲唔夠多會唔會好蝕？
基本上而家條條院線嘅入會優惠都好多，隨時一入會就封咗蝕本門，之後睇戲就已經係淨賺。又用返百老匯會員為例，一年會費$120(續會$100)，入會或續會時送1張贈券，生日月份去counter又拎1張贈券，已經差不多扺返會費，仲未計生日同續會時，夾埋多150積分，夠做兩次買一送一有突。

至於MCL CLUB嘅入會優惠仲多元化，$198嘅MCL CLUB PLUS，就有2張2D禮券，4張$20現金券，1張生日贈券，2張買一送一券，再加一大堆小食現金同折扣優惠添。

唔鐘意喺戲院食嘢的話，可以試吓轉售果啲小食優惠券。我就真係試過放上轉賣網站，果疊用唔著嘅紙，竟然成功換到廿幾蚊返來。

不過有一點要留意，入會時送嘅禮券，好多時都有附帶條款，例如唔可以六、日或特定日子、時間使用，最好Check清楚先入會，以免中伏。

三. 點入會先最化算？
大家知道咗入會有咁多著數，係唔係即刻想去晒各大院線入會呢？千其唔好咁心急，就算你係超級戲迷，都絕無可能用得晒所有戲院優惠，如果為咗用埋啲優惠，夾硬睇多幾套戲，反而仲易洗突兼浪費時間。而且積分太分散，好難可以用得著。

正確做法係只揀其中一至兩個院線嚟入會，至於點揀，我會建議先研究一下自己嘅睇戲習慣，睇吓自己去邊間戲院最多，然後就去果間戲院嘅院線申請做會員。如果有儲開飛尾嘅習慣，呢個時候就可以用嚟做統計喇。

又或者從地區去考慮，揀最近自己屋企嘅戲院，或者方便約人嘅旺區戲院。好似百老匯院線喺九龍區，例如旺角、油麻地、尖沙咀、觀塘、鑽石山都有戲院，而且多數喺正鐵路沿線，同朋友睇完戲後，搵食或者返屋企都容易啲。

不過站喺宅人立場嚟講，唔駛問一定揀返MCL。因為呢度經常會播宅向嘅劇場版動畫，或者搞Live Viewing活動，而且好多時都係獨佔(其實係其他院線唔肯上啫)，仲搞過新海誠見面會呢類特別活動。宅人年年都要去MCL「朝聖」幾次，做會員的話，應該好快就可以儲到唔少積分。

四. 點儲積分先最快？
有個講出來簡單，但做起嚟困難嘅方法，就係約埋幫宅朋友一齊睇戲，然後自己負責買飛時，就可以一次過儲到大量分數喇。做搞手，唔係人人都願意，因為真係好煩，又要夾時間夾地點，買飛後有人甩底要搵人補上，可能仲要安排埋之後嘅聚餐地點等等。不過呢啲蝕底嘢，總要有人去做架。如果搞一次聚會，可以儲夠分睇多兩套戲，會唔會覺得好受啲呢？

但有樣嘢要切記，就係積分可以自己袋，但折扣優惠，記得要分返畀朋友。例如張飛係9折，你就收人全價，人地拎起飛尾一睇個票價，就知你中間抽油水。呢種小家行為，唔好話戲友，就連朋友都會好快無晒。相反，你肯益吓人，人地下次睇戲，自然就會搵返你，甚至對方自己買戲飛時，都會主動問你借個會員身份去買，自動幫你儲埋分添。

五. 留意信用卡優惠
唔好以為會員優惠一定係最抵，而家好多信用卡公司，都會同電影院線合作做推廣，用信用卡買飛隨時仲抵。當然有啲情況，可以信用卡同會員會惠同時使用，呢層就要睇返唔同公司嘅條款喇。

我幫大家搵咗啲網上文章，裡面有齊唔同戲院嘅優惠列表，方便參考。如果仲未入會，就快啲行動，越早儲分越著數啊。

https://www.edigest.hk/89501/
https://blog.moneysmart.hk/zh-hk/budgeting/%E6%88%B2%E9%99%A2%E6%9C%83%E5%93%A1%E5%84%AA%E6%83%A02018-%E6%88%B2%E9%99%A2-%E5%84%AA%E6%83%A0-%E6%9C%83%E5%93%A1-%E7%9D%87%E6%88%B2-%E6%AF%94%E8%BC%83-2018/
https://blog.moneysmart.hk/zh-hk/credit-cards/%E4%BF%A1%E7%94%A8%E5%8D%A1%E7%9D%87%E6%88%B2%E5%84%AA%E6%83%A0%E8%B2%B7%E4%B8%80%E9%80%81%E4%B8%802018/
https://www.moneyhero.com.hk/blog/zh/%E4%BF%A1%E7%94%A8%E5%8D%A1%E6%94%BB%E7%95%A5-%E4%BF%A1%E7%94%A8%E5%8D%A1-%E6%88%B2%E9%99%A2-%E8%B3%BC%E7%A5%A8%E5%84%AA%E6%83%A0

儲幾多分都係假，平飛先係王道
上面講咗咁多入會同儲分技巧，無錯係可以慳到錢，但有時買十張飛先夠分換一張免費飛，幫補真係好有限。所以與其諗盡方法儲分，不如搵吓有無平飛可以買到，咁仲慳得多。

香港有好多舊式戲院，好似寶石、巴黎倫敦紐約米蘭，正價戲飛都只係40-50蚊，平時可以留意吓有咩啱睇嘅熱門戲喺呢度上映。如果嫌太舊，大可以考慮啲新開嘅戲院，例如MCL長沙灣，為咗吸客做宣傳，所以暫時會用全日45蚊嘅平價做招徠。

https://hk.ulifestyle.com.hk/topic/detail/206715/

其實仲有一招必殺技，不過對於宅人來講喇喎，難度相當高，呢樣就係 —— 星期六、日，睇．早．場！

而家睇套戲，正價閒閒地都要過百蚊，但早場都仲係4、50，可以慳到近半嘅睇戲錢。就好似全城都爭崩頭嘅《復仇者聯盟4》2D版咁，好多戲院早場都要收百一至百二，簡直係㩒住搶！不過我就搵到荔枝角D2 Place嘅CGV Cinema，竟然$55有交易，加埋網上手續費$8，3張飛都只係需要$189，就算早啲起身都抵啦。

不過我知呢招，對於大部分宅人來講並唔適用，星期五六夜晚，當然要用嚟煲機啦，之後就瞓到下午兩三點，先至願起身食個TEA，又點可能睇到早場呢？但唔講唔知，而家有唔少早場，遲到去11點半先開畫，如果戲院近屋企嘅，11點爬起身咬個包，行去戲院就剛剛好喇。

希望以上嘅心得幫到各位宅人，喺享受好戲之餘，又同時可以慳到錢！