Ang Kinaiyahan

Image Source

Kitang tanan isip mga lumulupyo sa kalibutan adunay tulubagon sa atong kinaiyahan. Wala lang kita gipakatawo niining kalibutana para lang pasipalaan ang kinaiyahan. Uo, gihatag kini sa atong magbubuhat aron aduna kitay mahimong pinuy-anan, aron kita adunay magamit samtang ania pa kita niining kalibutanan. Apan dili igo nga hangtud lang kita sa paggamit niini. Kinahanglan usab nga ato kining ampingan ug kung mahimo protektahan sa kadautan.

Nagatoo ka ba nga ang kinaiyahan mahibalo mo balos sa mga taong tampalasan? Nasayod ka ba nga sa makadaghan na nga higayon gipakita sa kinaiyahan nga wala siya sa mga gipangbuhat sa kadaghanan? Maayo kung mao. Apan sa mga taong wala nasayud niini, palihug ko ug pagbasa aning maong sulat. Kini usa ka pagpahayag sa mahimong hinungdan nganong lahi na karon ang dagan sa atong panahon. Layo ra sa kaniadto.

Kaniadto, talagsa ra kaayo ta makadungog ug mga bagyo. Kung balikan nato ang nangaging panahon, wala koy mahinumduman nga dakong dagok sa panahon niining atong nasud. Uo naay ulan, kusog nga ulan, apan taman lang to didto. Apan karon, lahi na ang dagan sa panahon. Magbagyo na gani, mo aksyon na kabalaka ang mga tao kay lagi dili lang kini mo daut sa mga kabtangan, kundili, mikitil pa kini ug kinabuhi sa tao.

Image Source

Pipila na ka mga bagyo sa karon nga panahon ang mikitil sa mga libo-libo ka kinabuhi? Daghan na. Bisan asang bahin sa Pilipinas, nakatilaw na sa hampak sa atong kinaiyahan. Taga Mindanao kaman, Visayas ug Luzon, kita tanan nakatilaw na sa kabanagis sa kinaihan. Daghan kanato ang nahimong biktima niini. Apan kadyot lang, tinood ba nga kita ang biktima niining maong mga dagok sa panahon? Hunahunaa sa pag-ayo kay basin matingala ka kung ato na lang madunggan nga naghatag lang diay ug leksyon ang kinaiyahan kanatong tanan.

Leksyon? Uo, leksyon, pwede pud natong tawagon nga nanimalos lang ang kinaiyahan sa mga pagpasipala nga gibuhat sa mga tao ngadto kaniya. Nasayod kitang tanan nga wala kitay tinguha nga magpasipala sa atong kinaiyahan. Bisan kinsay atong pangutanon, wala gayuy moangkon tungod kay, simple lang, wala sila masayod sa ilang gibuhat. Mahimong sa ilang hunahuna ug kasingkasing wala, apan sa mga binuhatan, aduna.

Wala ka ba matingala nganong inani na kahadlok o kaisog ang kinaiyahan? Ingnon na lang nato nga nasuko na kini siya sa padayon nga pagdaut sa mga tao sa iyang mga binuhat. Ang kaniadtong limpyong palibot, tin-aw nga kadagatan ug limpyong kahanginan, wala na kini karon. Ug kung aduna man, dili mo na kini makaplagan sa atong syudad, toana kini sa mga kabukiran diin aduna pay mga tao nga naghatag ug bili niini.

Image Source

Daghan gayod ang mo supak niining maong pahayag, hilabi katong mga mamumuo ug mga kapitalista, tungod kay moingon man sila nga ilang tinguha dili man sa pagdagmal sa kinaiyahan, kundili ang pagpa-uswag niini. Tinood ba kaha kini? Dili kaha ang ilang mga bulsa ang ilang gipa uswag? Dili na kita matingala nga tungod sa kwarta, kayang dagmalan ug pasakitan ang kinaiyahan. Mo pataya man gani ug tao kana pa kahang kinaiyahan ang walay panimoot.

Dira nasayop ang uban kay o ang kadaghanan diay. Abi kay dili mo tingog ang yuta, dili mo estorya ang mga kahoy, dili mo rason ang mga tubig ug dili mo hilak ang kahanginan, wala na kuno kini kinabuhi ug panimoot. Ang inaning klase mga tawhana, nabutahan na sa ilang mga ambisyon ug kadaghan sa ilang mga kwarta. Murag ulaw paminawon nga kung kinsa pa katong dagko ug kinaadman ug adunahan, mao pa kadto ang dili kabalo manghuhuna alang sa kinaiyahan.

Siguro tinood ang panultihon nga "Ang kwarta ang ugat sa tanang kadautan." Dili dautan ang kwarta, ang tinood, importante kini alang kanatong tanan kay pinaagi niini nabuhi kitang mga tao. Apan tungod niini, daghan sab and mga tao ang nakalimot nga dili lang kwarta ang importante sa kalibutan.

Image Source

Aduna pa kaha kitay higayon nga mamawi sa kinaiyahan? Paminaw nimo pwede pa kaha natong ibalik ang tanan? Wala ko kabalo. Wala ko sa posisyon para mo tubag anang butanga tungod kay wala akoy igong gahum o kahibalo sa kung gayud ang mahimong sangputan niining tanan. Apan siguro ang atong dakong mahimo mao ang paghatag ug dakong bili sa kung unsa ang anaa kanato karong panahuna.

Imposible nang ibalik ang kaniadtong kahimtang sa atong kinaiyahan, ang ato na lang mahimo karon mao ang pag-amping niini para sa atong mga anak ug sa umaabot nga henerasyon sa atong mga kaliwatan. Mo sugot na lang ba diay kita nga dayon na mabungkag kini kalibutanan tungod lang sa mga tinguha sa mga kapitalista, nga kung boot hunahunaon, para lang sa ilang kaugalinong bulsa?

Image Source