කොළ පාට ඇළ ළඟ හැන්දෑව!

බෝඩිම ටිකක් එහාට වෙන්න තියෙනවා ඇළ පාරක්. ඉතින් ඇත්තටම ඒක බොහොම පිරිසිදු වතුර ගලන් යන, කුණු කිසිම දෙයක් වැටිලා නැති ලස්සනම ලස්සන ඇළ පාරක් නෙමෙයි. හැබැයි නිස්කලංක හවසක් හොයාගෙන වාඩිවෙලා ඉන්න, කතා කරන්න ඒ ඇළ ඉවුර නියමයි. ජොගින් වලට ඇළ ඉවුර හරහා සක්මන් කරන කීප දෙනෙක් හැරුණහම කපුටෙක්ගෙන් වත් කරදරයක් නෑ.

ඇළ ගාවට යමුද? සමහරක් දවසට මගෙන් මගේ හොඳම යාලුවට හරි එයාගෙන් මට හරි ඔන්න ඔය message එක එනවා. එදාට ඉතින් කොහොමත් අපි ඉන්නෙ ඔය ඇළ ගාව තමයි. හප හප ඉන්න මොනවහරිත් අරගෙන..! මං මේ කවිය ලිව්වෙ එහෙම ගෙවිලා ගිය හැන්දෑවක් මතක් වුණ වෙලාවක.

රේල් පාරෙ සංඟ්දා එළිය දිහා බලාගෙන රේල් පීළි උඩින් පැන පැන ගිහින් ඇළ ඉවුර ළඟට යන එක මං ආසම ගමන් වලින් එකක්. ජීවිතේ ගිය හොඳම ගමන් කියලා දවසක මතක් කරගන්න මට තියෙන්නෙ මෙන්න මේ වගේ ගමන්!

කොළ පාට ඇළ ළඟ හැන්දෑව!

රේල් පීළි පන්නාගෙන
රතු එළිය මත දෑස් දල්වා
ඒ උඩින් පැන පැන ඇවිද යන
හදිසියෙ හැන්දෑවක් වන
කෙල්ලකි..!

මාලුවෙක් ද නැති, මලක් ද නැති
ඒ කොළ පාට ඇළ බැම්ම මැත
එයින් පසු හිඳින්නේ..
කොල්ලෙක්ද සමඟ කෙල්ලෙකි..!

බිඳෙන්නේ කොතනින්ද
කොච්චරක් බිඳුණාද
ලෝකයම පෙරලෙන්නේ කවදාද කොතනිදිද??
හොඳින් හඳුනන කොල්ලෙකි..

දුකින්ද සතුටින්ද? චෝදනා හෙම මුකුත්
තියෙනවද?
මේ සතිය වැරදුණේ කොතනිදිද?
කියන්නට බයක් හෙම නොදැනීම
සමහරක් විට පුදුමෙකි..

කොල්ලෙක්‍ ය කීවාට
ඇත්තටම ඒ
බොහොම හොඳ සෙවණක් සහිත
ආදරේ බිත්ති ඇති
කුඩා මුත් සුවඳැති ගෙදරකි..!