අපි වෙලේ පැන්නෙමු | 5% for SL Charity

පුරුද්දක් විදියට මං හවසට අම්මාගේ ලඟට වෙලා මිදුල වටේ ඇවිදින්න කැමති. මොකද කිව්වොත්, හවස කියන්නෙ අම්මා මල් පැල වලට සාත්තු කරන වෙලාව. අම්මාගෙන් ආව පුරුද්දක් වෙන්නත් ඇති මං මල් වලට හරිම කැමති. අදත් වෙනදා වගේම හවස් වෙද්දි මල් වල වැඩ පටන් ගන්න සූදානම.

අද අපිට අලුතින් මල් ලැබුන දවසක්. මාසයකට දෙකකට වරක් නිවාඩුවට ගෙදර එන දවසට අම්මා ශේප් කරගන්න මල් පැල් ටිකක් ගෙනාවානම් හරි කියලා අයියා දන්න නිසා.

ඉතින් අලුතින් ලැබුන මානෙල් පැලේකුත් තිබුන නිසා අපිට මඩ ටිකක් සොයගන්න පහල වෙල් යායට යන්න වුනා.

මේ වෙල් යාය ගැන කිව්වොත්, පුංචි සන්දියේ මතක මහා ගොඩක් පිරුන වෙල් යායක්. සම වයසෙ කොල්ලො දෙන්නෙක් එක්ක හැදුන නිසාම වෙන්න ඇති මටත් ඒ කාලේ කොල්ලෙක් වගේ ගතිගුන තිබුනා. අපි තුන් දෙනා එකතු වෙලා මඩේ පැනලා නටපු, තිත්ත පැටව් අල්ලන්න වෙලේ බැහපු, සරුංගල් යවපු ඒ අතීතය එකින් එක මගේ මතකයට ගලාගෙන ආවා. ආයේ කවදාකනම් මේ වගෙ මතකයන් අපේ ජීවිත වලට එකතු කරගන්නද.

ඒ අතරේ තාමත් මතක් උනාම හිනා යන මතකයක් අයේ උඩටම මතු වෙල ආවා. දවසක්, මායි මගේ අයියා, ඒ කියන්නෙ මගේ වයසෙම ලොකු අම්මාගෙ පුතා, අපි දෙන්නා එක්ක තිත්ත පැටව් අල්ලන්න හිතාගෙන වෙලට ගියා. ඒ පුංචි කාලේ අපිට ඒක සතුටක්. පව් පිං වගේ දේවල් ගැන ලොකු තේරුමක් නෑ.

අල්ලන මාලු පැටව් දාන්න හිස් ටොපි බෝතලයකුත් අතේ. අන්තිමට අපි මුලු වෙල් යායෙම ඇවිදලා බොතලේ පිරෙන්න තිත්තයො අල්ලා ගත්තා. අනේ මේ මාලු පැටව්න්ට පීනන්නවත් ඉඩ මදි නේද කියලාවත් අපිට තෙරුනේ නෑ. අන්තිමට අම්මාගෙන් බැනුම් අහලා ඔක්කොම මාලු ටික ආයෙමත් ගිහින් දැම්මා.

මේ දේවල් මතක් වෙද්දි අපෙන් පස්සේ පුංචි උන් හරි පව් නේද කියලත් හිතුනා. අම්මායි මායි එක්ක පොඩි නංගිත් අපිත් එක්ක වෙලට ගියා. මේ පුංචි අය පරිසරය ඉගෙන ගන්නෙ පොතෙන් විතරක් වෙලා. එයාට අද අත්දැකීම හරිම සතුටක්. අම්මා මල් පැල වලට ඕන මඩ එකතු කරන අතරේ, අපි දෙන්න වෙලට බැහලා කොක් මොට කඩන්න ගත්තා. මේක මලකුත් නොවෙන එත් අමුතු ලස්සනක් තියෙන දෙයක්. කුඹුරු නොකරන කාලෙට හැදෙන දෙයක්.

මේ අතරේ තව කරදරකාරයෙක් අපේ පස්සෙන් ඇවිත් මඩට පැන්නා. හපොයි! මෙයා නම් මට වැඩ ගොඩක් වැඩි කරා.

කාලෙකට පස්සේ මේ විඳගත්ත වෙනස මගේ හිතට අමුතුම සතුටක් ගෙන ආවා 🥰. අන්තිමේදී මට හිතුනෙ, ඔන්ලයින් පන්ති, මොබයිල් ගේම් අතරේ හිර වුන පුංචි ජීවිත ටික මොහොතකට හරි වෙලේ මඩ ගොඩකට ඇදලා දැම්මොත්, කොයිතරම් සතුටක් උන්ටත් ලැබේවිද කියලා.