Lincah U Groeh

Di Aceh na saboh makanan yang nan jih seulincah, nyakni boh kaye nyang diboh bumbu lage saka atawa gula, sira, caplie, ie boh kuyun, boh me dan laen-laen. Seulincah nyan pih na macam bagoe, lage seulincah mameh dan seulincah biasa. Lheuh nyan na cit seulincah bruk u groeh.

Jinoe, seulincah bruek u groh kadimeukat di Aceh Rayeuk, nan jih rujak u groh, rujak nakeuh basa Indonesia keu seulincah. Seulincah u groeh dipeugot dari bruk muda yang mantong leumik. Cara ukoe jih, wate tayeuh ngon gigoe mantong mangat tapajoh, boh u nyang dipakek keu nyan nakeuh boh u mantong bajik. Nyum bruek muda nyan nakeuh klat-klat alang meujampu mameh meunan.

Seulincah bruk u nakeuh makanan ureung gampong, biasajih geupeugot lheuh cot uroe, wate geuduk-duk meukawan sambilan geujungkat keung keugob. Seulincah bruk u nacit nyang jeut keu peutrok heut ureung mume.

Seulawet nyoe, lheuh sekian thon han meureumpok pajoh le selincah bruk u bajik, karena hana nyang peugot le, maka ka mudah, so mantong nyang hawa, kajeut jak bloe bak keude di bineh jalan di Indrapuri. Saboh ceupe yum jih 12 ribe sagai. Sep brat murah untuk jeuneh kuliner nyang jareung nyan.

Teunte, tapajoh seulincah meunan, mangat lom bila na keuripet/keuripep pisang wak. Karena alat seulincah sep brat mangat meunyo talhap ngon keuripet. Meusap-sap meunan rasa jih. Nyoe kheun aneuk mit jino: bertus.

Ilon wate kupajoh seulincah nyan tingat kuh wate saboh jan di gampong. Wate nyan kujak u gle jak koh naleung leumo, salah saboh nyang paleng seureng kupajoh nakeuh bruk u bajik. Tente kuyeuh ngon gigo karena hana kuba parang. Masa nyan koh naleung mantong ngui sadeup nyang meugigoe lage gogajo buso.

Aci kapike ju keudrokeuh, kiban hi wate kuyeuh lage nyan. Nyang bek kajak peugah lon hi bui, kutakat bak talak keuh, sebab ike kon bui.

Nyoe mandum nakeuh nikmat Allah brie, karena dame antara GAM ngon RI, maka ho nyang tajak mangat, pu nyang hawa teuh mudah tamita. Tapi bek hawa atajeh meurangkaho, menyo nyan suwah wo u rumoh, hanjeut meurot pat nyang galak. Pulom ata hareum, nyang haleu pih suwah pajoh lam kama.

Ijih meno nah, peuduk sipupu bak neuduk droe, bek tajampu lawok. Pakon bruk u putik mangat tapeugot seulincah? Karena nyan ka neuduk droejih. Aci keuh bruek u nyan tapeuplik, teunte na Meuoh ban nyum jih, suwah talungkop beulangong laam umong blang tho.

Nyo tulesan hana meurumpok rewad dari kurator Indonesia karena kutuleh dalam basa Aceh, kareuna nyan keuh maka peureute kurator nyang jeut basa Aceh suwah vote nyoe barang. Karena meunyo hana so vote, kob brat weuh lon, sep brat hek lon tuleh.

Singoh meunyo jai vote, loncok peng lonjak bloe baje baro keumak lon, so tuoh ukeu nyoe yum SBD teumboh 500.000 sineuk. Lam minet ju kaya teuh.

Kajeut dile beuh, nyan bek tuwoe jak bloe seulincah u groh nyan di Indrapuri. Kajeut dile beuh, karap cot uroe, kujak pajoh bu dile ngon aneuk mit.