Birong Mapait, Tamis ang Kapalit

Mapagbunying gabi, mga kababayan, kaibigan at sa lahat ng mambabasa. Itong aking akda ay magsisilbing piyesang ilalakip ko para sa patimpalak ni @tagalogtrail na pinamagatang "Patimpalak sa Biglaang Kolaborasyon Ika-Anim na Araw". Kung nais ninyong suportahan siya, ay maaari lamang na puntahan ninyo ang kanyang akdang patimpalak at samahan natin sya sa pag supporta sa ating sariling wika.

---

Image source: pixabay.com

Birong Mapait, Tamis ang Kapalit

---

Sa hinaba-haba man daw ng prosisyon, sa simbahan parin ang tuloy.
Tulad ng batis, sapa at ilog, na sa dagat dumadaloy.
Pag-ibig ko sayo'y 'di matatapos, bagkus pa'y lalong lumago.
Wala akong balak iwaksi, o kahit man lang itago.

Tuwing babalikan ko ang mga panahong lumipas.
Mga araw na gusto kong hilahin bawat minuto at pabilisin ang oras.
Kilig at ngiti sa mukha ko'y tiyak mababakas.
Sapagkat di ko inaasahan sa altar tayo mag wawakas.

Panahon ng kamusmusan nang tayo unang magtagpo.
Mga batang paslit, nagkakila sa ngalan ng laro.
Ipinakilala ka sa akin ng kaibigan kong, kaibigan mo rin.
Di ko sukat akalaing kalaunan ika'y aking mamahalin.

Nang lumalim ang pagkakaibigan, ako sa iyo'y nabighani.
Waring ang puso ko'y yari sa bakal, at ikaw ang bato balani
Bawat sandali ay nais kitang kasama at kapiling.
Kulang ang araw pag 'di ka nakikita't marinig boses mong malambing.

Ngunit, subalit, datapwat, di ko sukat akalain.
Mga magulang mo giliw ay ilalayo ka sa akin.
Doon sa malayong lugar ng Maynila, balak ka nilang patirahin.
Pag-uugnayan natin ay kanilang binalak patirin.

Sadyang mapait mag biro ang tadhana.
Maramdaman ang ganitong sakit, ay di ko alintana.
Batid ko'ng pareho tayong nasasaktan at nag durusa.
Wag kang mag-alala sinta, di ako susuko, ika'y makakaasa.

Ngunit sa ating dalaway naging mabait ang kapalaran.
Mga hiling at dasal nati'y nabigyan ng katuparan.
Nag-bunga lahat ng ating pag-sisikap at pag pupunyagi.
Sa birong mapait, pag-mamahalan parin natin ang nag wagi.

Ngayon tuwing binabalikan ko ang nakaraan.
Masaya kong maibabahagi at mailalarawan kanino man.
Na sa pag tulog sa gabi, ikaw ang katabi sa higaan.
At pag gising sa umaga'y unang nasisilayan, mukha mong walang kapares ang kagandahan...

---

Maraming salamat sa pag basa ng aking munting akda, naway nagustuhan ninyo ang tulang aking ibinahagi at isunulat sa abot ng aking makakaya. Lubos akong nag papasalamat kay @mallowfitt sa pag-bibigay nya ng pahintulot na gamitin ko ang kanyang akdang pinamagatang "Pag-ibig na Wagas ay Itinadhana" na siyang tema ng patimpalak.

---

© @jamesanity06, 2018

Damo nga Salamat! Maraming Salamat po! Thank you Very Much!