Hikayat Muda Seudang, Pt. 28; Lam perjalanan

lamkote (49)in #poem • 6 years ago (edited)

SEUNAMBONG CEURITA

Canden rupa si bungong nanggroe
Mala lam jaroe ka gob po jeumba
Puteh belia han meusanjong uroe
Seunambong taloe meusyen nyak dara

Dari youh ubit umu sikeutu
Si dara bungsu geuturi hana
Hana teujalok watee sep umu
Sikrek geumeusu narit meujeumba

Ban beungoh uroe ka siap beurangkat
Jaroe geu mumat di apacut baka
Geu kalon seunue le cut ti hayat
Keumuen beurangkat jak seutot rupa

Geujok baluem le apacut baka
Nyoe hai Muda beukai ulon bri
Bacut lon pasoe dinar dirham ka
Ta ngui le gata kiban nyang sakri

Muda Seudang izin geulakee
Tujo ka teuntee bak ujong ruja
Lantang geuhila ra-ueh meubatee
Taloe bineh gle panteu bidara

Geujak han rijang alang meubacut
Maklom hai po cut nyoe phoun meurantoe
Han abeh meuhoe ra-ueh bek meucuet
Payah ta runut meugisa lampoe

Geukalon u uneuen dum blang meuhalak
Leupah that lagak pade ka beunteng
Geu kalon u wie uteuen pih tan soe reupah
Nanggroe indatu cah hana soe bandeng

Trouh bak punca blang geupiyoh lindong
Tamong lam warong geuneuek jep kupi
Watee geupeurati ureueng duek lam warong
Ladom prak eumbong ladom meudodaidi

Muda geupeusan saboh kupi pancong
Ngon kuweh pocong jeut keu teumon ie
Geukalon boh punti meubalot on keurusong
Peusanan geusambong jampu ngon kupi

MEUSAMBONG

Bek tuwoe neubaca chit ata awai mangat meuho uram ngon ikue;