HIKAYAT ACEH " ALUE AREH" # WRITING
Deungoen Bisminlah, lon puphoen kisah
Lon pujoe Allah, Sidroe yang Esa
Ban bandum pujoe, meuwoe keu Allah
Yangka neulimpah, Atueh rhueng donya
Bandum lat batat, peuneujuet Allah
Rahmat neulimpah, peutroen u donya
Meunyoe tasyukur, keu Nikmat Allah
Teunte neutamah, meulipat ganda
Meusoe yang ingkar, Nikmat bri Allah
Azueb meuleupah, dalam nuruka
Oleh seubabnyan, rakan meutuah
Ta pujoe Allah, bek sagai lupa
Tapubuet suroeh, peujueoh teugah
Yang larang Allah, bek takeurija
Syurga Nurakan, janji di Allah
Rakam meutuah, hanpue syoek sangka
Seukeudar pujoe, ohnoe lon peugah
Keu Rasulullah, Seulawuet teuma
Nabi Khataman, utusan Allah
Yang ba Risalah, ban sigoem donya
Oh lhuehnyan saleum, bak lon sipatah
Ummi ngoen Ayah, tuha ngoen muda
Gantoe lon jak droe, keunan lon langkah
Saboeh Naseukah, pasoe lam dada
Haba Nasehat, keu hamba Allah
Beugoet neukeubah, beujuet peunawa
Nyoe Asoe kitab, yang ulon peugah
Masa khalifah, nyan Abu baka
Baca beuhabeh, rakan meutuah
Pakriban kisah, nyan ulue Raya
Nyan Ulue Areh, suruhan Allah
Manyet Syakuwah, geuyue jak siksa
Nyoe keujadian ,saboeh seujarah
Masa khalifah, abu bakari
Oh kalheuh wafeut, di rasulullah
Neumat perintah, geunantoe nabi
Nibak si uroe , gobnyan meulangkah
Deungo jamaah, bak ureueng mate
Oh ban sare troek, ngoen cara ringkas
Seumanoe bagah , gafan ka hase
Yoehnyan geupeutron , akan jeunazah
Ubak leun rumoh, le wareh ahli
Untuk geupeubuet, shalat jeunazah
Uleh jamaah, sahabat nabi
Bak watee geudoeng , lam seuh jeumaah
Geukalon leumah, nibak si mate
Gafan meugrak grak, geunta sileupah
Pareksa bagah , ngon gundah hatee
Oh geupareksa ,geukaloen leumah
Uleu na saboeh , hebat bukon le
Jigrueb bak tague, mayet syakuwah
Asoe jipajoeh ,darah ka ile
Yoehnyan sahabat, khalifatullah
Geu keuneuk bunuh , uleu beu mate
Maka di uleu , ji cunggoek bagah
Ucap syahadah, faseh bukonle
Oh lheuh di ucap , kalimah syahadah
Ubak khalifah , meunoe jikheun kri
Kupueu neupoh lon , waya khalifah
Ulon tan salah, waya habibi
Neubangket ulo, keunoe le Allah
Azeub yang peudeh, keujih geuyue bri
Mulai jinoe , sampoe kiamat
Jih geuyue lakanat, oleh illahi
Karena dijih, raya that salah
Disisi Allah, Tuhanku Rabbi
Salah pertama , mayet syahkuwah
Jideungoe kasah , azan berbunyi
Kadeuh dideungoe, seruan Allah
Jipoeh beurakah, han dipeuduli
Ubak jamaah , han jimeulangkah
Ngon seubabnyan keuh, azeub geuyue bri
Salah keu dua , mayet syahkuwah
Zakeut han jiboeh, fitrah han jibri
Salah yang keu lhee, yang that azimah
Disisi Allah, Tuhan ku rabbi
Tutoe ulama , watee geupeugah
nasehat keujih, han jipeuduli
Jitoep geuliyueng, hoe laen langkah
Lom dipeujaeh, ngon tutoe keuji
Adak Tapateih, ban gobnyan peugah
Han sit ditimoeh, ija pujanji
Meunan di uleu , haba jipeugah
Ubak khalifah , Abu bakari
Ohnoe katamat , haba seujarah
Neucok neukeubah, poasoe lam hate
Terimakasih sudah membaca dan mengunjungi blog @musdarkeren. Kalau suka jangan lupa upvote dan resteem.